Í drögunum kemur fram að allir sem koma að knattspyrnunni eigi að lágmarka samskipti við aðra og forðast fjölmenna staði. Það eru staðir eins og verslanir, kvikmyndahús, veitingastaðir og skemmtistaðir. Ef nauðsynlegt er að vera í samskiptum við aðra skal halda tveggja metra fjarlægð og nota andlitsgrímu „Persónulega finnst mér þetta ósanngjörn krafa á leikmenn nema það verði komið til móts við þá á einhvern hátt,“ segir Arnar um drögin að reglunum.
Þá segir Arnar að leikmenn á Íslandi séu ekki atvinnumenn heldur áhugamenn og því sé erfitt að biðja leikmennina hér á landi um að haga sér eins og atvinnumenn „Sumir hafa ágætlega upp úr því að spila fótbolta á Íslandi en það er mikill minnihluti,“ segir Arnar. „Að ætlast til þess að skikka leikmenn, sem flestir eru að gera þetta í bland við vinnu eða skóla, til þess að haga sér eins og atvinnumenn í þessu umhverfi – mér finnst það ósanngjörn krafa og ég sé það ekki gerast.“
Hann spyr hvort það sé eðlilegt að þessi krafa sé sett á leikmenn. „Hvað þýðir þetta? Er þetta eitt af skilyrðunum til að fótboltinn fari af stað og ef svo er, hvernig er hægt að setja svona skilyrði á leikmenn án þess að rætt sé við þá? Fyrir mér er þetta enn þá frekar óljóst. Ég sé ekki hvort þetta eru skilyrði eða tilmæli. Ef það kemst upp að leikmenn séu að fara út á mannamót einhvern þriðjudaginn er þá mótinu stofnað í hættu? Það eru margar spurningar í þessu.“