Ólafur Kristjánsson, þjálfari FH, hefði viljað þrjú stigin í kvöld í leik gegn Blikum í úrvalsdeild karla.

Það var líf og fjör á Kópavogsvelli en leiknum lauk með 3-3 jafntefli þar sem bæði lið fengu urmul af færum.

Ólafur ræddi við Stöð 2 Sport eftir leikinn en FH fékk dauðafæri í blálokin og hefði getað náð inn sigurmarki.

,,Ég hefði viljað setja hann í restina, við fengum dauðafæri. Við vorum að verjast prýðilega og vissum að við værum að mæta góðu sóknarliði og okkur tókst að loka ágætlega á það,“ sagði Óli við Stöð 2 Sport.

,,Þetta var sex marka leikur, það var sótt og það voru færi og fjör en ég er svekktur með að hafa ekki nýtt færið í lokin.“

,,Þegar maður upplifir leikinn og ekki búinn að sjá hann aftur er þetta blörrað. Fyrstu 15-20 mínúturnar beindum við þeim í svæðin sem þeir máttu fara í en svo föllum við til baka og pressum ekki boltamanninn.“

,,Í hálfleik töluðum við um það að þora að stíga upp í boltamanninn og láta Elfar flytja hann upp en að þora að fara á miðjumennina.“

15 ára strákur, Logi Hrafn Róbertsson, kom inná sem varamaður í seinni hálfleik og stóð sig vel í vörn FH.

,,Logi spilaði mikið á undirbúningstímabilinu og stóð sig vel, hann er pollrólegur og leysti verkefnið vel.“

,,Það var leikur um daginn í Víkinni þar sem mér fannst leikurinn ekki þess eðlis, við vorum í brekku og ekki rétt að setja hann inná í svona langan tíma. Maður þarf að velja rétt.“