Robert Laul, blaðamaður Aftonbladet í Svíþjóð, ræddi við Vísi í dag um undrabarnið Ísak Bergmann Jóhannesson.
Ísak er talinn gríðarlegt efni en hann skoraði sitt fyrsta meistaraflokksmark fyrir Norrkoping gegn Goteborg í gær.
Miðjumaðurinn skoraði með frábæru skoti innan teigs og lagði hann svo upp annað mark í sigrinum.
Laul fer fögrum orðum um Ísak í samtali við Vísi og býst ekki við að hann verði þar mikið lengur.
„Fyrir tímabilið gerðum við lista yfir bestu ungu leikmennina í sænsku úrvalsdeildinni og hann var þar í 1. sæti. En samt gátum við ekki ímyndað okkur að hann myndi gera svona mikið, svona snemma á tímabilinu. Það kemur okkur á óvart hvað hann hefur þroskast hratt,“ segir Laul við Vísi.
,,Ég get ekki ímyndað mér að hann verði mikið lengur en út sumarið. Stærri félög reyna væntanlega að fá hann því hann er einfaldlega það hæfileikaríkur.“
„Kannski vill hann vera áfram í Svíþjóð og öðlast meiri reynslu áður en hann tekur næsta skref á ferlinum. En ég er sannfærður um að stærri félög reyni að kaupa hann í sumar.“
Laul fer svo langt og líkir leikmanninum við Alexander Isak sem er landsliðsmaður Svía og á mála hjá Real Sociedad.
Isak vakti fyrst athygli sem táningur í Svíþjóð og var stuttu seinna keyptur til Borussia Dortmund.
,,Hann er með mikla tækni og getur gert hluti með boltann á miklum hraða. Hann getur tekið boltann með sér á fullri ferð í átt að marki andstæðinganna og sett hann í netið. Ég hef aldrei séð sautján ára leikmann gera þessa hluti, nema kannski Alexander Isak.“