Ólafur Helgi Kristjánsson, sem hefur þjálfað FH síðan í ársbyrjun 2018, var ráðinn til danska liðsins Esbjerg en Hjörvar Hafliðason, stjórnandi hlaðvarpsins Dr. Football, greindi frá þessu á Twitter-síðu sinni fyrr í dag.
Í kjölfar viðburða dagsins fóru fram ýmsar sögusagnir af stað um það hver muni taka við FH. Hjörvar Hafliðason velti því fyrir sér hvort Davíð Þór Viðarsson, fyrrum fyrirliði FH, gæti tekið við keflinu en Davíð lagði skóna á hilluna eftir tímabilið í fyrra.
Nú er þó orðið ljóst hverjir það eru sem þjálfa FH út leiktíðina. Samkvæmt heimildum 433 munu þeir Eiður Smári Guðjohnsen, fyrrverandi landsliðs- og atvinnumaður, og Logi Ólafsson, sem þjálfaði síðast Víking Reykjavík, þjálfa FH út tímabilið.
