Í gær greindist íslenska knattspyrnukonan, Andrea Rán Snæfeld Hauksdóttir leikmaður Breiðabliks með jákvætt sýni í COVID-19 sýnatöku. Hún kom til landsins 17. júní sl. og reyndist sýnataka á landamærum neikvæð. Síðar kom í ljós að hún hafði verið í nánd við smitaðan einstakling erlendis og fór því aftur í sýnatöku. Sú sýnataka reyndist jákvæð. Sem stendur er hún einkennalaus.
Bæði kvennalið Breiðabliks og KR eru í sóttkví vegna málsins og fleiri til. Birkir Sveinsson mótastjóri KSÍ segir við Fréttablaðið að leikjum þessara liða verði frestað en aðrir leikir í deildinni fari fram.
Birkir segir einnig að komi upp fleiri smit verði ekkert sett í pássu og mótin verði keyrð áfram.
„Mótin munu því ekki breytast umfram það að leikjum Breiðabliks og KR á meðan leikmenn og forráðamenn þeirra liða munu frestast fram yfir sóttkvína. Við munum keyra mótin áfram þrátt fyrir að smit muni greinast,“ segir mótastjórinn enn fremur við Fréttablaðið.
Fimm leikjum hefur verið frestað vegna málsins. Þar sem leikmenn Breiðabliks og KR hafa verið sett í sóttkví, hefur tveimur leikjum Breiðablik og KR í Pepsi Max deild kvenna verið frestað.
Leikirnir eru:
30. júní kl. 19.15 Þróttur R – Breiðablik
1. júlí kl. 19.15 KR – FH
6. júlí kl. 18.00 Breiðablik – Þór/KA
6. júlí kl. 19.15 Selfoss – KR
Einum leik í Lengjudeild kvenna hefur einnig verið frestað:
26. júní kl. 19:15 Augnablik – Tindastóll
Nýjir leikdagar ákveðnir síðar.