Viðar Halldórsson formaður aðalstjórnar FH og stjórnarmaður í ECA, hagsmunafls knattspyrnufélaga í Evrópu er ómyrkur í máli þegar kemur að viðbrögðum við ástandinu í íþróttahreyfingunni. Þetta kemur fram í viðtali í Fréttablaðinu.
Viðar segir að það vanti hraðari vinnubrögð og þeir sem hafi vit á málinu eigi að koma saman. Íþróttahreyfingin eins og margar aðrar greinar horfa fram á mikinn tekjubrest vegna kórónuveirunnar.
„Mín sýn á forystufólk í íþróttahreyfingunni er kannski öðruvísi en margra annarra. Mér finnst þetta orðið svo flatt einhvern veginn. Mér finnst, hvort sem þetta heitir hand-, fót-, eða körfubolti, eða hvaða nafn sem íþróttin heitir, að fólk hafi skoðanir en láti þær aldrei í ljós. Það er bara haldið kjafti og þagað. Það er eins og flatneskjan ráði för og mér finnst þetta vera að versna,“ sagði Viðar við Fréttablaðið.
Viðar leggur áherslu á það að öllum verði hjálpað en vill ekki að minni félög hafi áhrif á hvað verði gert.
,,Það þarf að sjálfsögðu að huga vel að félögunum úti á landi en það er hellingur af félögum sem er tekið tillit til. Það er ekki vinsæl skoðun að kalla þetta bumbubolta en þannig félög eru að taka ákvarðanir um kvennabolta, barna- og unglingastarf og ýmislegt fleira. Mér finnst eins og það sé verið að taka of mikið tillit til þeirra.“