Íslensk íþróttafélög eru mörg hver að róa lífróður þessa dagana, verið er að taka til í rekstrinum vegna kórónuveirunnar. Tekjugrunnur margra félaga er breyttur, fyrirtæki munu draga saman í styrkjum og óvíst er hvenær Íslandsmótin fara af stað.
Bjarni Helgason, blaðamaður á Morgunblaðinu telur að misfróðir menn leggi nú orð í belg þegar rætt er um fjármál félaganna á Íslandi.
,,Mikið hefur verið rætt og ritað um fjárhag íslenskra íþróttafélaga að undanförnu. „Að spenna bogann of hátt“ er önnur setning sem hefur farið mikinn í tíðarandanum. Margir hafa látið í sér heyra, misfróðir, um það hversu illa íslensk íþróttafélög eru rekin og að hér sé íþróttafólk sem er í meðallagi gott að þiggja allt of há laun fyrir sína vinnu, ef vinnu skyldi kalla,“ skrifar Bjarni í Morgunblaðið.
Bjarni segir að fólk þurfi ekki að horfa neitt lengra en til Englands þar sem sama staða blasir við.
,,Það þarf ekki að horfa neitt lengra en til nágranna okkar á Englandi til þess að átta sig á stöðu mála. Þar blasir lítið annað en gjaldþrot við mörgum félögum sem leika í ensku úrvalsdeildinni í knattspyrnu, ef tímabilið verður ekki klárað. Leikmenn í stærstu knattspyrnuliðum heims hafa þurft að taka á sig launalækkanir hægri vinstri undanfarna daga svo skipið sigli ekki í strand.“