Stuðningsmenn Liverpool eru vægast sagt ósáttir með félagið sitt þessa dagana, og þá ákvörðun að félagið ætlar að láta ríkið greiða stærstan hluta af launum starfsmanna. Ástæðan er kórónuveiran og útgöngubann sem ríkir á Englandi.

Liverpool hefur ákveðið að allt starfsfólk fyrir utan leikmenn fari í leyfi, þannig fær starfsfólkið 80 prósent af laununum sínum frá ríkinu. Liverpool borgar svo hin 20 prósentin.

Stuðningsmenn Liverpool eru ósáttir með félagið að nýta sér þetta, enda er þetta úrræði fyrir fyrirtæki í neyð. Liverpool hagnaðist um rúmar 40 milljónir punda á síðasta ári.

Piers Morgan, sjónvarpsstjarna á Bretlandi segir að gott orðspor félagsins sé nú farið. ,,Liverpool hefur byggt sér upp frábært orðspor undir stjórn Jurgen Klopp, liðið vann Meistaradeildina og er með frábært lið. Allir voru stoltir af þeim og héldu með liðinu,“ sagði Morgan.

Hann kennir John W Henry, eiganda Liverpool um málið. ,,Það er allt farið, því að milljarðamæringurinn sem á félagið tók þá ákvörðun að það væri rétt að setja starfsfólk á bætur, þrátt fyrir mikinn hagnað á síðasta ári.“