Gary Martin, framherji ÍBV fær ekki að ferðast til Íslands frá London eins og staðan er í dag. Ástæðan eru hertar reglur í Bretlandi.

Gary Martin hefur dvalið í heimalandi sínu síðustu mánuði en átti að koma til Vestmannaeyja í dag og hefja æfingar með ÍBV.

Enska framherjanum var hins vegar ekki hleypt um borð í vél EasyJet. ,,Var nálægt því að lesa yfir starfsmanni EasyJet, hún vildi að ég færi inn í London til að finna íslenska sendiráðið og koma mér til baka fyrir klukkan 09:00 flugið. Með fjórar töskur með mér,“ skrifar Gary Martin á Facebook.

EasyJet vildi ekki hleypa Martin um borð nema að hann væri með staðfestingu á búsetu á Íslandi. ,,Ég get ekki flogið nema að ég fái staðfestingu um búsetu á Íslandi eða að sendiráðið leyfi mér að fljúga.“

Í samtali við 433.is vonaðist Gary eftir því að komast til landsins í dag, hann væri að bíða eftir bréfi frá sendiráðinu um að hann mætti ferðast til Íslands.