,,Greiðsla fyrir dómgæslu í leikjum efstu deildar karla í fótbolta er 135 prósentum hærri en fyrir leiki í efstu deild kvenna. Sömu greiðslur eru fyrir dómgæslu hjá báðum kynjum í körfubolta og handbolta,“ skrifar Kristjana Arnarsdóttir, fréttakona á RÚV á vef ríkisfjölmiðilsins.
Morgunblaðið fjallaði um laun dómara á Íslandi í gær, fyrir leik í efstu deild karla í knattspyrnu fær dómari leiksins 37.600 krónur. Fyrir leik í Pepsi Max-deild kvenna er greiðslan, 16.000 krónur.
Mist Edvarsdóttir, landsliðskona í knattspyrnu og leikmaður Vals er ansi óhress. „Mér finnst þetta bara mjög sjokkerandi. Maður hefur nú alveg heyrt af því að það sé einhver launamunur en 135% er bara alveg rosalega mikið,“ sagði Mist við RÚV.
,,Þetta er bara svolítið blaut tuska í andlitið og bara vanvirðing í rauninni. Það er eins með leikmenn og dómara, eftir því sem reynslan verður meiri, því betri verður þú í þínu fagi. Það er rosalega pirrandi sem leikmaður að horfa upp á það ár eftir ár að það kemur inn dómari, hann fær leik í C-deild karla og efstu deild kvenna, fær að reka sig á, gera mistökin og hlaupa af sér hornin og svo er hann bara farinn í efstu deild karla og við sjáum hann ekki meir. Þetta er bara, eins og ég segi, vanvirðing og ömurlegt í rauninni að heyra þessar tölur í dag.“
Klara Bjartmarz, framkvæmdarstjóri KSÍ ræddi málið við RÚV. „UEFA og FIFA verður seint hampað fyrir einhverja jafnréttisbaráttu. Þannig að þetta er pínu spark í rassgatið fyrir okkur og mér finnst að knattspyrnusambandið ætti aðeins að endurskoða sín mál.“
Pepsi Max deildin á 433 er í boði 
