Harry Kane, framherji Tottenham er á batavegi og gengur endurhæfing hans betur en fólk þorði að vona. Framherjinn ætlar sér að snúa aftur á völlinn innan sex vikna.

Kane reif vöðva aftan í læri svo illa að hann þurfti að fara í aðgerð, atvikið átti sér stað á nýjársdag.

Talið var í fyrstu að Kane myndi ekkert spila á þessu tímabili og að hann væri tæpur á að ná Evrópumótinu í sumar.

Nú stefnir í að framherjinn verði klár í slaginn í apríl og geti hjálpað Tottenham á endasprettinum í deildinni og komið sér í gott form fyrir Evrópumótið.

Tottenham hefur saknað þess að hafa ekki sinn besta leikmann og félagið spilað illa síðustu vikur.