Ari Freyr Skúlason er á leið heim í Val ef marka má Ríkharð Óskar Guðnason fréttamann á Stöð2. Ari Freyr ólst upp hjá Val áður en hann fór í atvinnumennsku.

Ari er 33 ára gamall en hann leikur í dag með Oostende í Belgíu en hann hefur verið í atvinnumennsku frá árinu 2006.

Hann hefur leikið í Svíþjóð, Danmörku og svo í Belgíu frá árinu 2016.

„Það eru heldur betur fréttir. Ég hugsa að deildin næsta sumar verði rosaleg,“ sagði Rikki G í hlaðvarpsþætti á Vísir.is í dag.

„Ég fór aðeins á stúfana í gær og heyrði frá mjög svo áreiðanlegum manni sem er mjög vel tengdur Hlíðarenda að Valsmenn eru búnir að tala við og undirstinga það að Ari Frey Skúlason mæti heim næsta sumar.“

Ari Freyr hefur verið lykilmaður í landsliði Íslands um langt skeið og fór með liðinu á bæði EM og HM.