Stjarnan hefur samið við sóknarmanninn Ólaf Karl Finsen sem snýr nú aftur til félagsins eftir dvöl hjá Val og FH.
Ólafur yfirgaf Stjörnuna fyrir tímabilið 2018 og varð Íslandsmeistari með Val það sumarið. Hann var lánaður til FH í sumar og stóð sig með ágætum.
„Virkilega gott að fá Óla Kalla með sín gæði inn í hópinn, ég hef trú á því að þetta muni styrkja okkur til framtíðar, enda Óli Kalli frábær leikmaður sem getur leyst margar stöður og er með gæði sem munu nýtast okkur í þeirri vegferð sem við erum“. segir Þorvaldur Örlygsson, þjálfari mfl. karla.
„Geggjað að fá Óla aftur í Stjörnubúninginn, hér hefur honum liðið best og það verður frábært að fá tækifæri að vinna með Óla aftur“. segir Rúnar Páll, þjálfari mfl. karla.
Ólafur Karl var hetja Stjörnunnar þegar liðið varð Íslandsmeistari í fyrsta og eina skiptið árið 2014.