Everton hefur tapað þremur leikjum í röð í ensku úrvalsdeildinni en fær frábært tækifæri til að rétta við kútinn gegn Fulham um helgina.
Everton tapaði gegn Manchester United áður en landsleikjahlé kom en liðið hafði verið á góðu skriði áður en þessi taphrina liðsins kom. Áður hafði Everton tapað þremur leikjum í 14 síðustu undir stjórn Ancelotti.
Fulham hefur ekki byrjað vel eftir að liðið kom upp en Liverpool Echo bindur vonir við að Gylfi Þór Sigurðsson springi út um helgina. Gylfi hefur lagt upp eitt mark á tímabilinu og á enn eftir að komast á blað í markaskorun.
„Gylfi hefur komið að fimm mörkum í fimm leikjum gegn Fulham (4 mörk og 1 stoðsending), hann skoraði tvö gegn Fulham með Swanea árið 2012 og svo aftur tvö í september árið 2018 með Everton,“ segir í umfjöllun Liverpool Echo.
„Það á eftir að koma í ljós hvort Gylfi fái að spila í leiknum, meiðsli Richarlison gætu haft mikið að segja um það. Ef hann fær tækifæri þá segir sagan okkur að hann gæti gripið það.“