Valgeir Sigurðsson sem á sæti í stjórn KSÍ fór mikinn á Twitter í kvöld og gagnrýndi Kolbein Sigþórsson framherja íslenska liðsins eftir frækinn sigur á Rúmeníu. Segja má að Valgeir hafi fengið mjög misjöfn viðbrögð við færslu sinni og flestir gagnrýna hann fyrir færslur sínar.
Valgeir sem kemur úr Stjörnunni var kjörinn í stjórn KSÍ á ársþingi sambandsins. „Eftir leik: Góður sigur Íslands., Gylfi! Aron Einar! Guðlaugur Victor orðinn lykilmaður, síðasti landsleikur Kolbeins? Tólfan með sitt á hreinu,“ skrifar Valgeir og virðist ekki vilja sjá Kolbein aftur í treyju liðsins.
Kolbeinn kom inn sem varamaður fyrir Alfreð Finnbogason í leiknum en framherjinn er markahæsti leikmaður í sögu Íslands ásamt Eiði Smára Guðjohnsen.
Þórður Einarsson einn af fimm þjálfurum Þróttar segir. „Er það samt hlutverk stjórnarmanna í KSÍ að tvíta svona um einstaka leikmenn liðsins . Óheppilegt.“
Valgeir segir að Kolbeinn sé að missa af lestinni. „Það er samkeppni um þessa stöðu. Mögulega er Kolbeinn að missa af lestinni. Vona að ég hafi rangt fyrir mér en set spurningamerki við frammistöðu þessar 20 mín.“