Bjarni Helgason blaðamaður á Morgunblaðinu veltir steinum í blaði dagsins og skrifar um óábyrgan rekstur hjá mörgum knattspyrnufélögum landsins. Félögin fá á baukinn frá blaðamanninum.
„Ef það er eitthvað sem kórónuveirufaraldurinn hefur kennt manni þá er það sú staðreynd að knattspyrnufélög á Íslandi í dag eru ekki rekin með skynsemi að leiðarljósi heldur tilfinningar,“ skrifar Bjarni Helgason í Morgunblað dagsins.
Bjarni ræðir svo um þá reglugerð sem KSí setti fyrir mótið um að reynt yrði að klára öll mót fyrir 1 desember, vegna kórónuveirunnar. Þrátt fyrir það hafa mörg félög kallað eftir því að mótið yrði blásið af og reksturinn væri erfiður. Þessi sömu félög höfðu hrúgað til sín erlendu vinnuafli.
„Nú lá það fyrir áður en mótið hófst að það gæti gerst að það yrði spilað til og með 1. desember. Samt kepptust lið við að hrúga til sín erlendum leikmönnum. Sum gengu meira að segja svo langt að lækka íslenska leikmenn í launum til þess að rýma fyrir erlendum leikmönnum á launaskránni,“ segir Bjarni og setur svo fram spurningu.
„Af hverju ekki að sækja bara fjóra erlenda leikmenn í staðinn fyrir fimm og gera þá ráð fyrir því að þeir geti allir klárað tímabilið, fari svo að það verði spilað út nóvember?“
Bjarni vonar að þeir sem hæst láta í sér heyra fari að slaka á. „Ég vona innilega að mótið verði klárað, sama hvað. Ég vona líka að menn hætti að opinbera eigin vanhæfni til þess að vera í forsvari fyrir íþróttafélag á Íslandi á samfélagsmiðlum með því að drulla yfir ákvörðun KSÍ um að halda leik áfram.“