Það virðist vera sem svo að íslenski unglingalandsliðsleikmaðurinn Ísak Bergmann Jóhannesson sé eftirsóttasti knattspyrnumaður í Evrópu um þessar mundir. Öll stærstu lið Evrópu eru að skoða þennan 17 ára dreng. Sænski vefmiðillinn Fotbollskanalen, segir að Mads Jörgensen, njósnari Liverpool, hafi verið mættur á leik Norrköping og AIK í gær til að skoða Ísak.
Ísak byrjar alla leiki hjá sænska félaginu Norrköping í úrvalsdeildinni, hann hefur skorað þrjú mörk og lagt upp átta á þessu tímabili. „Þetta hefur verið rosalegur áhugi, við erum með marga öfluga leikmenn en það er ekkert leyndarmál að þessi félög eru að skoða Ísak,“ sagði Stig Torbjornsen yfirnjósnari Norrköping.
„Norrköping á talsvert mikið magn af peningum og þarf ekki að selja. Ísak er með skynsaman umboðsmann og fjölskyldu sem vita hvað þau vilja og hvenær hann skal fara. Það er ekkert stress, þegar eitthvað kemur upp sem hentar öllum þá gæti eitthvað gerst.“
Torbjornsen staðfesti að Liverpool væri eitt þeirra félaga sem hefði áhuga á íslenska ungstirni. „Liverpool er eitt af þessum félögum en það eru önnur tíu að skoða. Öll bestu félög Evrópu hafa komið hingað að skoða hann, þau eru öll spennt. Liverpool er eitt þeirra en það eru tíu til viðbótar. Þetta er skemmtilegt fyrir okkur og Ísak líka.“
„Félag með mikla fjármuni gæti komið hingað á morgun eða eftir sex mánuði, það er gott að Ísak er rólegur og hefur góða aðila í kringum sig.“
Samkvæmt vef Transfermarkt er Ísak metinn á 1 milljón evra í dag eða 165 milljónir íslenskra króna, ljóst má þó vera að sænska félagið myndi krefjast miklu hærri upphæðar.
Ísak sjálfur ólst upp á Englandi þar sem faðir hans Jóhannes Karl Guðjónsson gerði það gott. „Ég hef alla tíð haldið með Manchester United, ég bjó í Manchester þegar faðir minn spilaði á Englandi og horfði á marga leiki,“ sagði þessi snjalli drengur eftir leikinn í gær.
Ísak útilokar þó ekki að spila fyrir Liverpool þrátt fyrir að halda með United. „Ég get ekki sagt það, Liverpool er að gera frábæra hluti. City og Liverpool hafa verið frábær síðustu ár,“ sagði Ísak, léttur í lund.
