Raheem Sterling, leikmaður Manchester City ætlar að stofna styrktarsjóð ætlaðan illa settum börnum. Á vef BBC segir að Sterling sé enn að móta verkefnið. Hann mun að öllum líkindum leggja til eina milljón punda sem samsvarar tæpum 200 milljónum íslenskra króna. Manchester City og aðal styrktaraðili Sterling munu einnig styrkja verkefnið.

Sterling er fæddur í Jamaíka og flutti til London þegar hann var barn. Hann vill hjálpa börnum í sömu stöðu og hann sjálfur var í sem barn. „Ef þau vilja komast í háskóla, þeim vantar fótboltabúnað eða hvað sem það er þá langar mig að hjálpa.“

Sterling hefur einnig tekið þátt í mörgum verkefnum til að aðstoða börn í Brent í norð-vestur London, þar sem hann ólst upp.

Marcus Rashford leikmaður Manchester United hefur einnig verið að aðstoða börn. Hann er með herferð þar sem markmiðið er að binda enda á fæðuóöryggi.