Mörg stórlið eru að skoða Ísak Bergmann Jóhannesson miðjumann Norrköping í Svíþjóð en hann hefur vakið mikla athygli fyrir öfluga frammistöðu í Svíþjóð á þessu ári. Ísak er 17 ára gamall Skagamaður.
Norrköpings Tidningar í Svíþjóð segir frá því að útsenari Manchester United hafi fylgst með Ísaki gegn Varbergs á sunnudaginn. Juventus hefur einnig verið orðað við þennan öfluga miðjumann.
Manchester United virðist svo hafa áhuga á þessum öfluga pilti sem hefur spilað fyrir öll yngri landslið Íslands. „Ég hugsa lítið um þetta, það er gaman að heyra af stórliðum að fylgjast með. Að þau telji mig vera góðan leikmann en ég hugsa bara um mitt lið,“ sagði Ísak.
Ísak er með samning við Norrköping í þrjú ár til viðbótar en faðir hans Jóhannes Karl Guðjónsson átti frábæran feril í atvinnumennsku og lék lengi vel á Englandi.
Ísak lagði upp í leiknum á sunnudag og spurning hvort útsendarar Manchester United haldi áfram að fylgjast með.
