Arsene Wenger, fyrrverandi knattspyrnustjóri Arsenal, sagði frá skemmtilegri sögu í hlaðvarpsþættinum Ornstein and Chapman.
Fyrir lokadag félagssskiptagluggans árið 2014 virtist allt stefna í að Danny Welbeck, þáverandi leikmaður Manchester United, færi til Tottenham, erkifjenda Arsenal. Wenger vildi fá leikmanninn til Arsenal.
Á lokadegi félagsskiptagluggans vaknaði Wenger snemma því hann átti flug til Rómar þar sem hann átti að stýra liði í góðgerðarleik.
,,Þegar ég var á flugvellinum var mér sagt að Welbeck væri að ganga til liðs við Tottenham. Ég náði að koma í veg fyrir það með því að vera í samningaviðræðum allan daginn,“ sagði Wenger í hlaðvarpsþættinum.
Seinna um daginn beið Wenger í röð í Vatíkaninu til þess að hitta páfann. Hann fór vísvitandi aftast í röðina til þess að eiga meiri tíma með umboðsmanni Welbeck í símanum.
,,Eftir að hafa talað við hann í dágóða stund sagði ég honum að ég gæti gæti ekki talað við hann lengur, ég stæði fyrir framan páfann og væri að fara hitta hann. Ég skellti á.“
Þrátt fyrir þessa atburðarás gekk Welbeck til liðs við Arsenal.
,,Ef ég hefði ekki verið að ferðast á þessum degi þá hefði Welbeck ekki komið til Arsenal. Ég hafði forskot á Tottenham því ég vaknaði klukkan 6 um morguninn og var laus allan daginn til þess að sannfæra leikmanninn,“ sagði Wenger í hlaðvarpsþættinum.