Harry Maguire fyrirliði Manchester United hefur verið í vandræðum innan vallar eftir að hafa verið handtekinn og sóttur til saka í Grikklandi í sumar.
Maguire hefur verið ólíkur sjálfum sér í vörn Manchester United í upphafi tímabils og átti svo slakan leik með enska landsliðinu í vikunni.
Margir hafa kallað eftir því að Maguire verði sendur í frí til að koma hausnum á sér í lag eftir atvik sumarsins en fyrirliðinn vill spila gegn Newcastle um helgina.
„Þegar Maguire stóð í vörninni í sigri á besta landsliði í heimi með Englandi þá þótti það eðlilegt. Svo fær hann fyrirsagnirnar núna, svona er fótboltinn,“ sagði Ole Gunnar Solskjær stjóri United.
„Harry vill alltaf spila, hann veit að hann kemur til baka og mun finna sitt gamla form.“
„Maguire fékk högg rétt áður en hann var rekinn af velli, við verðum að skoða ástandið í dag.“