Manchester United gekk frá samningi við Edinson Cavani á lokadegi félagaskiptagluggans en framherjinn frá Úrúgvæ kemur á frjálsri sölu. Samningur Cavani er til eins árs með möguleika á að framlengja hann um eitt til viðbótar.
Cavani fær 200 þúsund pund á viku hjá United, 35 milljónir á viku eða um 1,8 milljarð á ári í laun. Hann fær svo góðar 650 milljónir fyrir það að skrifa undir.
Cavani mun því missa af fyrsta leiknum þegar United mætir Newcastle um helgina. Cavani þarf að vera í tveggja vikna sóttkví þar sem hann var án félags og telst í skilningi laganna ekki sem atvinnumaður þegar hann kemur inn í landið.
Hans fyrsti leikur gæti orðið gegn PSG í Meistaradeildinni næstu viku þegar hann hefur lokið sóttkví.
Cavani kom til United eftir farsæla dvöl hjá PSG en þessi 33 ára framherji raðaði inn mörkum í Frakklandi.