Haukur Leifur Eiríksson, ungur leikmaður FH var sóttur með sjúkrabíl er liðið mætti ÍBV á laugardag. Leikið var í Skessunni, nýju knatthúsi FH.
Um var að ræða leik í Fótbolta.net mótinu en honum lauk með markalausu jafntefli.
Í síðari hálfleik leiksins, þurfti að kalla út sjúkrabíl en Haukur fékk þá slæmt högg á ökklann. ,,Þetta fór betur en á horfðist, þetta er ekki eins alvarlegt og óttast var,“ sagði Ólafur Kristjánsson, við 433.is í dag.
Haukur er ungur leikmaður en hann er fæddur árið 2002, FH spilaði mörgum ungum leikmönnum í þessum leik. Hópur liðsins er þunnskipaður og vantaði talsvert af eldri leikmönnum liðsins. Má þar nefna Björn Daníel Sverrisson, Steven Lennon, Morten Beck og Baldur Sigurðsson.
Hörður Snævar Jónsson, ritstjóri okkar var á vellinum og tók þessar myndir.