Víkingur Reykjavík býst við því að selja Óttar Magnús Karlsson, sinn skæðasta framherja í þessum mánuði. Þetta herma heimildir 433.is.
Fótbolti.net segir að Óttar sé á leið til Ítalíu. „Talið er líklegt að Venezia nái að klófesta þennan 23 ára sóknarleikmann sem hefur verið algjör burðarás hjá Víkingum á tímabilinu,“ segir í frétt Fótbolta.net.
Samkvæmt heimildum 433.is hafa umboðsmenn Óttars hjá Stellar Nordic átt í viðræðum við Venezia síðustu vikur.
Óttar hefur skorað 9 af 19 mörkum Víkings í efstu deild karla á þessu tímabili. Þetta verður í þriðja sinn sem Óttar Magnús fer í atvinnumennsku en hann er 23 ára gamall.
Hann fór ungur að árum til Ajax, hann kom heim en fór svo til Molde og spilaði einnig í Svíþjóð. Óttar mætti svo heim síðasta sumar en heldur aftur út á nýjan leik á næstu vikum.
