Gríðarlegur taprekstur var á knattspyrnudeild ÍA á síðustu leiktíð, þetta kemur fram í pistli sem Magnús Guðmundsson, formaður ritar á vef Skagafrétta. Tapið var 61 milljón króna.
,,Laun og annar rekstrarkostnaður hækkaði einnig umtalsvert milli ára og samanlögð áhrif þessa eru að félagið skilaði um 61 milljóna króna taprekstri á árinu 2019, í stað 47 milljóna króna hagnaðar á árinu 2018,“ skrifar Magnús.
Tekjur félagsins voru mikið niður en þar munar mest um þegar félagið hagnaðist verulega á sölu Arnórs Sigurðssonar til CSKA Moskvu árið 2018.
Magnús segir að standi til að taka til í rekstrinum og vonast félagið til að snúa þessu gríðarlega tapi við í hagnað.
,,Stjórn Knattspyrnufélags ÍA og framkvæmdastjóri í samvinnu við þjálfara og aðra starfsmenn hafa nú þegar farið í sérstakar aðgerðir við að greina vandann, draga úr kostnaði og auka tekjur. Á árinu 2020 er gert ráð fyrir fyrir miklum viðsnúningi í rekstri með því að draga úr útgjöldum og setja fram hóflega tekjuáætlun.“
,,Áætlað er að rekstur ársins 2020 skili jákvæðri niðurstöðu um 15 milljónir kr.“
Hér að neðan má sjá rekstrartekjur ÍA frá því í fyrra og árið á undan en þar sjást tölur eins og söluhagnað af leikmönnum.