Najila Trindade, brasilsíska fyrirsætan sem sakaði Neymar um nauðgun í sumar, hefur verið kærð fyrir fjárkúgun og fjársvik. Það var í maí síðastliðnum sem Najila fór til lögreglunnar í Sao Paulo og lagði fram kæru gegn knattspyrnumanninum. Sagði hún að nauðgunin hefði átt sér stað í París.
Dómari vísaði málinu frá í ágúst síðastliðnum vegna þess að ekki þóttu komnar fram fullnægjandi sannanir fyrir því að Neymar hafi gert eitthvað rangt.
Nú hefur lögreglan í Brasilíu gefið út kæru á hendur Najila sem er sökuð ýmislegt misjafnt. Þá hefur fyrrverandi kærasti hennar, Estivens Alves, einnig verið kærður í málinu en það verður í höndum dómara að ákveða hvort málið fari fyrir dómstóla.
Neymar neitaði því staðfastlega að hafa nauðgað Najilu en sjálf sagði hún að myndbandsupptaka, sem birtist opinberlega í byrjun júnímánaðar, væri sönnun í málinu. Sem fyrr segir vísaði dómari málinu frá og nú gæti Najila verið í vondum málum.