Fjalar Þorgeirsson, aðstoðarþjálfari Stjörnunnar, segir að liðið verði að vona það að FH vinni Mjólkurbikarinn.

Stjarnan er nú þremur stigum frá Evrópusæti eftir 3-1 tap gegn FH í kvöld en eitt auka sæti kemur inn ef FH vinnur bikarinn og hafnar í þriðja sæti.

,,Það er aldrei gott að tapa leikjum, við byrjum ekkert svakalega vel en vorum góðir fram að 60. mínútu og svo skora þeir jöfnunarmark og eftir það virtist leikur okkar hafa hrunið,“ sagði Fjalar við Stöð 2 Sport.

,,Það er góð klisja að mörk breyti leikjum og það er nákvæmlega það sem gerðist. Við vorum með góð tök, við fáum svo mark á okkur sem við eigum ekki að fá og missum svo tökin. Hrós á FH sem gerði þetta vel.“

,,Við eigum þrjá leiki eftir og förum í þá alla til að vinna. Við misstum FH fram úr okkur og nú fáum við pottþétt lið í bakið á okkur sem vinna á morgun. Við verðum að vona að FH vinni bikarinn þá kemur eitt auka sæti í Evrópu.“