Hlaðvarpsþátturinn, 90 mínútur heldur áfram á fullu fjöri en um er að ræða þátt sem Hörður Snævar Jónsson, ritstjóri 433.is stýrir.
Þátturinn hefur notið mikilla vinsælda en afar áhugaverðir gestir hafa komið í þáttinn.
Gestur þáttarins að þessu sinni er Kolbeinn Sigþórsson sem er einn allra besti knattspyrnumaður sem Ísland hefur átt, þá sérstaklega þegar hann hefur klæðst treyju landsliðsins.
Eitt frægasta mark í sögu íslenska landsliðsins er í eigu Kolbeins er hann skoraði sigurmarkið gegn Englandi á EM 2016.
Það mark ættu allir að kannast við en Kolbeinn tryggði Íslandi 2-1 sigur með marki í fyrri hálfleik.
England hafði komist yfir snemma leiks með marki frá Wayne Rooney en strákarnir okkar höfðu að lokum betur 2-1 og fóru í 8-liða úrslit.
,,Það mark stendur klárlega upp úr. Við fengum mark á okkur eftir 8 mínútur eða eitthvað og þá hugsaði maður með sér: ‘shit, týpískt eitthvað,“ sagði Kolbeinn er hann rifjaði upp atvikið.
,,Svo kveiknar eitthvað hjá þessu liði, við komum til baka á hárrétti mómenti, strax í grímuna á þeim, 1-1.“
,,Þá finnur maður það bara að við erum komnir með momentumið og þegar þú ert inni á vellinum þá finnurðu það. Þú horfir í augun á leikmönnum og sérð að þessir gæjar ætli ekkert að tapa þessum leik.“
,,Þannig held ég hugsuðu Englendingar þegar að þeir fundu fyrir orkunni í okkur. Það er erfitt að spila gegn svona liði sem vinnur fyrir hvorn annan.“
,,Að ná þessum úrslitum þarna og skora sigurmarkið, það er algjörlega toppurinn á ferlinum hjá mér.“