Það er útlit fyrir það að varnarmaðurinn Matthijs de Ligt sé á leið til Juventus en Sky Sports greinir frá því.

De Ligt er 19 ára gamall Hollendingur en hann hefur borið fyrirliðabandið hjá Ajax við góðan orðstír.

Barcelona, Manchester United, Real Madrid og Juve hafa sýnt leikmanninum áhuga í sumar.

Nú er hins vegar útlit fyrir að De Ligt sé á leið til Juventus og kostar hann um 70 milljónir evra.

Talað er um að það hafi verið Cristiano Ronaldo sem sá um að sannfæra De Ligt um að ganga í raðir ítalska stórliðsins.

Ronaldo ræddi við De Ligt eftir leik Portúgals og Hollands í Þjóðadeildinni sem gæti hafa skilað árangri.