Spænski miðillinn Sport fullyrðir það í dag að Brasilíumaðurinn Neymar sé á leið til Spánar.

Neymar hefur undanfarin tvö ár leikið með Paris Saint-Germain en var fyrir það á mála hjá Barcelona.

Hann er mikið orðaður við endurkomu til Spánar en bæði Real Madrid og Barcelona eru nefnd til sögunnar.

Sport greinir frá því í dag að Neymar hafi sent leikmönnum Barcelona skilaboð á forritinu WhatsApp þar sem þeir ræða reglulega saman.

,,Hafið ekki áhyggjur, ég er að koma,“ á að standa í skilaboðunum sem Neymar sendi á fyrrum liðsfélaga.

Forseti PSG gaf það út fyrr í mánuðinum að hann væri kominn með nóg af stjörnustælunum í Neymar sem ku vera ósáttur í Frakklandi.