İrfan Kahveci, leikmaður Tyrklands og stanbul Başakşehir segir að Íslendingar muni fá góðar móttökur í Tyrklandi, þrátt fyrir reiðina sem ríkir núna.

Tyrkir voru brjálaðir í gær, þeir voru ósáttir með langa bið á Keflavíkurflugvelli og að þvottabursta haf verið beint að Emre, fyrirliða liðsins. Það reyndist vera belgískur ferðamaður en ekki fréttamaður.

,,Í gær var slæmt ástand á flugvellinum, ég tel að Tyrkir muni taka vel á móti Íslendingum, þetta breytir því ekkert,“ sagði Irfan en Ísland heimsækir Tyrki í undankeppni EM í haust.

,,Við viljum einbeita okkur að því sem gerist á vellinum, það er undir sambandinu að skoða annað. Við viljum sigur gegn Íslandi.“

Liðin mætast á Laugardalsvelli á morgun en sigur kemur Tyrkjum í 12 stig og frábæra stöðu að komast á EM.

,,Þetta er mikilvægur leikur fyrir okkur, mikilvægari en gegn Frökkum. Við erum komnir með aðra löpp inn á EM með sigri, ég er viss um að við munum klára þetta á morgun,“ sagð Irfan en liðið vann Frakka á laugardag.

,,Við erum með góða kynslóð af leikmönnum, leikurinn gegn Íslandi er mikilvægari en gegn Frökkum. Við gerum kröfu á sigur.“