Hlaðvarpsþátturinn, Dr. Football heldur því fram að Grótta sé ekki að segja allan sannleikann, þegar kemur að launamálum leikmanna meistaraflokks karla. Grótta hefur státað sig að því að greiða ekki leikmönnum sínum laun, það kom liðinu upp í Pepsi Max-deildina.
Ágúst Gylfason, þjálfari liðsins sagði á Stöð2 í vikunni að þannig yrði það áfram. Grótta myndi ekki greiða neinum leikmanni laun næsta sumar.
Sérfræðingar þáttarins sögðu í dag að samkvæmt þeirra heimildum væri Grótta að bjóða leikmönnum samning, þar sem greidd væru laun. ,,Það er ekki komið út í það, það er ekki rétt hjá þeim. Þeir voru að bjóða Arnari Sveini (Geirssyni) samning í vikunni. Það var peningur í því tilboði, leikmenn eru að fá borgað fyrir spilaða leiki en kannski ekki föst laun. Það eru laun, ef þeir spila,“ sagði Mikael Nikulásson, sérfræðingur þáttarins.
Kristján Óli Sigurðsson tók undir þetta. ,,Var lygamælir á þeim þegar þetta viðtal var tekið?.“
Hjörvar Hafliðason, stjórnandi sagðist hafa heimildir fyrir því að Grótta væri að bjóða laun. ,,Þeir ætla að halda þessu uppi, miðað við okkar heimildir þá hefur Grótta boðið samninga þar sem eru peningar. Það er eitthvað alltaf í boði.“
Mikael sem er þjálfari Njarðvíkur er með skilaboð til Gústa Gylfa. ,,Þeir borga æfingaferð fyrir alla leikmenn, Gústi Gylfa kemur í fínt viðtal við Gaupa. Segir að þeir ætli að styrkja sig með fjórum leikmönnum, hvar ætlar þú að fá þessa leikmenn án þess að borga þeim neitt? Láttu mig vita hvar þeir eru, ég skal taka þá í Njarðvík og borga þeim eitthvað smá. Hann fær þá ekki.“