Eiður Smári Guðjohnsen átti mjög farsælan feril sem leikmaður en hann er í dag þjálfari U21 landsliðsins ásamt Arnari Þór Viðarssyni.
Eiður lagði skóna á hilluna árið 2016 en hann endaði félagsferilinn hjá Molde í Noregi eftir stutt stopp í Kína.
Fyrir það lék Eiður með Bolton Wanderers í eitt ár tímabilið 2014-2015 og skoraði fimm mörk í 21 deildarleik.
Bolton lék þá í næst efstu deild Englands en liðið er í C-deildinni í dag eftir mikil fjárhagsvandræði.
Í dag eru nákvæmlega fimm ár frá því að Eiður samdi við Bolton á ný og fagnaði hann því á Instagram.
Eiður lék einnig með Bolton frá 1998 til 2000 áður en hann samdi við Chelsea þar sem hann vann ensku úrvalsdeildina.
