,,Stóri strákurinn að leita að laununum mínum,“ skrifaði Steven Lennon, framherji FH í færslu á Instagram í gær. Færslan hefur vakið gríðarlega athygli, sérstaklega í ljósi þess hvernig umræðan hefur verið. Launamál og þá vandræði FH-inga að standa við greiðslur, hafa komið reglulega fram í hlaðvarpsþáttum síðustu mánuði. Færsla Lennon er olía á þann eld sem logað hefur.
Á myndinni mátti sjá skoska framherjann á Tenerfie, þar sem sonur hans var að moka á ströndinni. Mikið hefur verið rætt um þessa færslu, framherjans. Lennon er einn af þeim sem sagður er ósáttur með hvernig launamál félagsins hafa verið.
Málið var tekið fyrir í hlaðvarpsþættinum Dr. Football þar sem Hjörvar Hafliðason, Mikael Nikulásson og Hrafnkell Freyr Ágústsson fóru yfir stöðuna.
Kristján Óli Sigurðsson var fjarverandi í þætti dagsins en hefur fullyrt launavandræði FH í marga mánuði en félagið hefur alltaf neitað.
,,Steven Lennon birtir þarna mynd af syni sínum sem er að grafa í sandinum og segir að hann sé að leita að launum pabba hans,“ sagði Hjörvar er umræðan fór af stað.
,,Mér finnst þetta rosalega leiðinlegt. Ástæðan er sú að FH setti ný viðmið í íslenskum fótbolta, þeir svona gerðu þetta upp.“
,,Ég get nefnt lítið atriði, þegar ég vann hjá Stöð 2 Sport og við vorum að fá þessa leikmenn til okkar – þú gast séð það að leikmenn FH voru betur þjálfaðir en aðrir. Þeir settu ný viðmið í öllum þessum málum og það kostar peninga.“
,,Það er erfitt að vera með metnaðarfullt starf í afreksstarfi hér á Íslandi.“
Hrafnkell bætir við að þetta sé mál sem hafi lengi verið vandamál. Að sumir FH-ingar hafi ekki fengið borgað á réttum tíma í dágóðan tíma.
,,Þetta gerist ekki bara á einni nóttu. Þetta er vandamál sem byggist á mörgum árum ef þið vitið hvað ég meina. Núna er allt komið í algjört fokk,“ segir Hrafnkell.
Mikael setur spurningamerki við það að Lennon sé enn að spila fyrir FH þrátt fyrir þessi vandræði.
Á sama tíma er hann ekki hrifinn af þessari ákvörðun Lennon að birta svo viðkvæmt mál á samskiptamiðla.
,,Samt heldur Steven Lennon alltaf áfram í FH? Mér finnst eins og þetta sé að gera ár eftir ár eftir ár. Hann væri ekki í FH ef hann væri ekki búinn að fá launin sín síðan 2018 er það nokkuð,“ segir Mikael.
,,Ég held að þetta sé ekki bara svona í FH. Ég sá að Höfðinginn, hann vaktar Twitter og svona, hann setti strax inn Twitt. Mér finnst skrítið af Lennon að henda þessu inn. Hann er klárlega að skjóta á FH þarna.“
,,Hann er basically að segja: ‘Ég vinn hjá FH og FH er ekki að borga mér launin og þeir hafa verið að neita.’