Einar Þór Sigurðsson skrifar frá Kísinev í Moldóvu:
Ísland og Moldóva eigast við í Kísinev í Moldóvu annað kvöld í síðasta leik okkar í undankeppni EM 2020. Fyrir leikinn er Ísland með 16 stig í þriðja sæti riðilsins og á ekki lengur möguleika á að komast beint á EM þar sem Tyrkir eru með 20 stig og Frakkar með 22 stig.
Albanía er í fjórða sæti riðilsins með 13 stig og getur náð Íslandi að stigum ef liðið vinnur heimsmeistara Frakka á heimavelli sínum á morgun og Ísland tapar fyrir Moldóvu. Moldóva hefur aðeins unnið leik í undankeppninni til þessa, 1-0 gegn Andorra á heimavelli sínum. Liðið átti þó góðan leik gegn Frökkum á fimmtudag og tapaði 2-1 þar sem sigurmark Frakka kom 10 mínútum fyrir leikslok. Moldóvar eru því sýnd veiði en ekki gefin.
Ljóst er að Erik Hamrén mun ekki taka neina áhættu í liðsuppstillingunni fyrir leikinn annað kvöld. Vörnin verður að öllum líkindum sú sama og gegn Tyrkjum og þá er morgunljóst að Hannes Þór Halldórsson verður í markinu. Birkir Bjarnason átti mjög góðan leik á miðjunni gegn Tyrkjum á fimmtudag og hann mun halda sæti sínu í liðinu nema eitthvað óvænt komi upp. Gylfi Þór Sigurðsson verður á sínum stað í byrjunarliðinu.
Arnór Ingvi Traustason byrjaði á vinstri vængnum gegn Tyrkjum en möguleiki er á að Hamrén geri breytingar þar enda nokkrir möguleikar í stöðunni. Ari Freyr Skúlason getur leyst stöðuna ágætlega og þá myndi Hörður Björgvin Magnússon koma inn í bakvörðinn líkt og gerðist gegn Tyrkjum. Mikael Neville Anderson kom inn á fyrir Ara undir lok þess leiks og gerði vel þær mínútur sem hann fékk að spila.
Jón Daði Böðvarsson byrjaði á hægri kantinum gegn Tyrkjum en eftir meiðsli Alfreðs Finnbogsonar færði hann sig í framlínuna og Arnór Sigurðsson kom inn fyrir Alfreð og fór út á kant. Arnór mun að líkindum fá sæti í byrjunarliðinu og Jón Daði byrja í fremstu víglínu ásamt Kolbeini Sigþórssyni. Kolbeinn er í dauðafæri á að slá markametið og svo lengi sem hann er heill mun hann spila gegn Moldóvu. Viðar Örn Kjartansson ferðaðist með liðinu í gær eftir að hafa verið veikur gegn Tyrkjum og möguleiki er á að hann fái sæti í liðinu nú þegar Alfreð er meiddur. Meiri líkur eru þó taldar á að hann byrji á bekknum en komi inn á í seinni hálfleik.
Eins og fyrr segir mun Erik Hamrén ekki taka neina áhættu í leiknum og spila sínu besta liði, enda kemur fátt annað en sigur til greina í lokaleik riðilsins. Þetta kemur þó allt saman væntanlega betur í ljós í dag en þá verður haldinn blaðamannafundur þar sem Erik Hamrén og Jón Daði Böðvarsson sitja fyrir svörum.
