Flestir knattspyrnuaðdáendur hafa heyrt um tölvuleikinn Football Manager sem hefur gert það gott í fjölmörg ár.
Í gegnum tíðina hafa borist fréttir af nokkrum einstaklingum sem hafa reynt að sækja um störf vegna góðs gengis í þessum tölvuleik.
Andrej Pavlovic, ungur Serbi, elskar að spila FM og hefur hann nú tryggt sér starf hjá liði FK Bezanija í heimalandinu eftir frábært gengi í leiknum.
Pavlovic stýrði Bezanija í 16 ár í leiknum og kom því á toppinn á þeim tíma en liðið er í annarri deildinni í Serbíu.
Hann sótti um starf sem svokallaður greiningaraðili hjá félaginu og benti auðvitað á góðan árangur í leiknum er hann sendi inn ferilskrá.
,,Ég ætla ekki að monta mig en ég er goðsögn í Football Manager heiminum mínum,“ sagði Pavlovic við TalkSport.
,,Ég benti þeim á afrekið og sagðist getað hjálpað þeim. Ég bjóst hins vegar ekki við að fá símtal til baka!“
,,Þeir báðu mig um að koma á leikinn á laugardaginn. Ég var í sjokki en svo buðu þeir mér sjálfboðastarf þar sem þeir eru í fjárhagsvandræðum.“