Lögreglan í Bretlandi gaf það út á fimmtudaginn að hætt væri að leita að framherjanum Emiliano Sala og flugmanninum Dave Ibbotson.

Sala og Ibbotson voru um borð í flugvél í síðustu viku sem hvarf skyndilega á leið sinni frá Nantes til Cardiff. Eftir 72 klukkutíma leit þá gafst lögreglan upp sem varð til þess að fjölskylda Sala bað almenning um hjálp.

Fjölmargir knattspyrnumenn hafa kallað eftir því að leitinni verði haldið áfram og þar á meðal Lionel Messi, leikmaður Barcelona.

Um helgina tókst að safna 300 þúsund evrum sem eru meira en 30 milljónir króna. Leit fór aftur af stað í fyrradag. Leikmenn eins og Demaray Gray hjá Leicester, Ilkay Gundogan hjá Manchester City og Corentin Tolisso hjá Bayern Munchen hafa styrkt málefnið.

Leitin virðist vera að færast nær því að finna vélina og þá sem voru í henni, sagt var frá því fyrir skömmu að hluti úr sætunum sem voru í vélinni hafi fundist.

Þessi tíðindi hafa haft mikil áhrif á leikmenn Cardiff, Sala hafði skrifað undir hjá félaginu en átti eftir að mæta á sína fyrstu æfingu. Hann var á leið til Wales þegar vélin hvarf.