Hörður Snævar Jónsson skrifar frá Elbasan:

Aron Einar Gunnarsson, fyrirliði íslenska landsliðsins sat fyrir svörum á fréttamannafundi í Albaníu í dag. Aron ræddi þar um heilsu sína.

Í hlaðvarpsþættinum, Dr. Football í dag var fjallað um Aron Einar. Rætt var um að líkamlegt atgervi Arons væri allt annað eftir að hann færði sig yfir til Katar, frá Englandi.

Aron hefur síðustu ár verið hálf meiddur en í dag virkar þessi magnaði leikmaður í sínu besta standi.

Um umræðuna í Dr. Football sagði Aron. ,,Það hefur líklega verið King Mæk, það er minn maður,“ sagði Aron og átti þar við sérfræðinginn góða, Mikael Nikulásson.

,,Mér líður bara vel, ég er góður í líkamanum. Mér finnst ég hafa svarað þessu oft, fyrir og eftir leikinn við Moldóvu. Ég væri búinn að spila meira ef ég væri áfram á Englandi.“

,,Ég hef spilað tvo leiki með Al-Arabi, mér líður vel í skrokknum. Ég er klár í leikinn á morgun, ég gef mig alltaf 100 prósent í leiki.“