Fyrr í dag var Knattspyrnufélag ÍA að ganga frá samningi við varnarmanninn Aron Kristófer Lárusson. Hann gengur til liðs við ÍA frá Þór á Akureyri en hann er fæddur árið 1998. Aron hefur leikið 71 leik á sínum ferli með Þór og Völsungi og skorað í þeim átta mörk.
Aron fetar í fótspor afa síns, Sigurðar Lárussonar, sem var mjög öflugur leikmaður ÍA á sínum tíma. Sigurður var fyrirliði sigursæls liðs ÍA á níunda áratugnum þegar liðið varð bæði Íslands- og bikarmeistari. Sonur hans og faðir Arons er svo Lárus Orri Sigurðsson, sem spilaði með Þór til fjölda ára og var atvinnumaður á sínum tíma áður en hann lauk ferli sínum formlega með ÍA árið 2010. Svo skemmtilega vill til að Aron skrifar undir samninginn á afmælisdegi afa síns, Sigurðar heitins.
Jóhannes Karl Guðjónsson þjálfari meistaraflokks karla lýsti yfir ánægju með að Aron hafi gengið til liðs við ÍA. Þrátt fyrir ungan aldur hafi hann spilað marga leiki með meistaraflokki og sé hugsaður sem framtíðarleikmaður hjá félaginu.
