Klara Bjartmarz, framkvæmdarstjóri KSÍ safnar nú gögnum í máli Björgvin Stefánssonar, eftir að hann lét rasísk ummæli falla í gær. Þetta staðfesti hún í samtali við 433.is.
Björgvin, leikmaður KR í Pepsi Max-deild karla, lét ummælin falla í beinni útsendingu á Haukar TV í gær. Björgvin sá um að lýsa leik Hauka og Þróttar R. á Haukar TV en þau lið áttust við í Inkasso-deild karla.
Björgvin er fyrrum leikmaður Hauka en hann tjáði sig um Archange Nkumu, leikmann Þróttar. ,,Þetta er það sem ég er alltaf að segja, það er svo stutt í villimannseðlið hjá svarta manninum,“ sagði Björgvin.
Björgvin baðst afsökunar á ummælunum skömmu eftir að þau féllu. Ákvæði eru í reglugerð KSÍ sem gera framkvæmdarstjóra, heimilt að vísa málinu til aga og úrskurðarnefndar.
Klara þarf fyrst að bíða eftir skýrslu dómara og eftirlitsmanns en ólíklegt er að eitthvað um mál Björgvins komi fram þar, þau gögn þurfa hins vegar að liggja fyrir áður en Klara tekur ákvörðun í málinu.
,,Eins og staðan er núna erum við að safna gögnum, knattspyrnan fordæmir alla mismunun,“ sagði Klara við 433.is og vitnaði í reglugerð 21.1.
Rasísk ummæli Björgvins gætu því orðið til þess að hann fær leikbann í Pepsi Max-deild karla.
Reglugerð KSÍ:
21.1. Framkvæmdastjóra KSÍ er heimilt að vísa til aga- og úrskurðarnefndar atvikum sem skaðað
geta ímynd knattspyrnunnar eða þeirra sem þátt taka í leiknum. Slík atvik hafa þá ekki komið
fram í atvikaskýrslum dómara og/eða eftirlitsmanns á leiknum en geta verið hvers kyns
ósæmileg framkoma á leikstað eða á annan hátt opinberlega.
