Brynjar Björn Gunnarsson og knattspyrnudeild HK hafa endurnýjað samning sín á milli um þjálfun meistaraflokks karla. Brynjar Björn náði mjög góðum árangri á sínu fyrsta tímabili með HK þegar liðið tryggði sér sæti í efstu deild með því að lenda í 2. sæti í Inkasso deildinni. HK setti jafnframt met í næst efstu deild (12 lið) með því að fá aðeins á sig 13 mörk í 22 leikjum.

Brynjar Björn býr yfir mikilli reynslu sem leikmaður og þjálfari. Hann er í hópi leikjahæstu leikmanna landsliðs okkar með 74 landsleiki eftir að hafa leikið með liðinu á árunum 1997 til 2009. Auk þess hefur hann leikið vel á fimmta hundrað deildarleiki. Brynjar Björn lék meðal annars fyrir KR, Våleranga, Moss, Örgryte, Stoke, Nottingham Forest, Watford og Reading á sínum ferli. Brynjar Björn lék í tvö ár í ensku úrvalsdeildinni með Reading og spilaði hann 43 leiki og skoraði 3 mörk. Jafnframt kom hann að þjálfun hjá úrvalsdeildarfélaginu meðan hann var enn leikmaður. Á árunum 2014 til 2017 var Brynjar Björn aðstoðarþjálfari Stjörnunnar og tók þar þátt í að landa Íslandsmeistaratitli.

„Ég er mjög ánægður með að framlengja samning minn við HK. Félagið er á hraðri uppleið hvort heldur sem er innan vallar eða utan. Mikið er af ungum og efnilegum leikmönnum í yngri flokkum félagsins sem verður spennandi að fylgjast með og þjálfa í framtíðinni. Við munum halda áfram að byggja ofan á það sem vel var gert í fyrra meðal annars með öguðum varnarleik og kröftugum sóknarleik“, segir Brynjar Björn.