Það voru ekki allir sammála því að það væri rétt að taka Albert Guðmundsson af velli gegn Frakklandi í gær.
Albert var einn líflegasti leikmaður Íslands í leiknum sem tapaðist þó sannfærandi með fjórum mörkum gegn engu.
Alberti var skipt af velli í seinni hálfleik í gær en sú skipting fór ekki vel í marga þar sem við þurftum að skora mörk.
Sigurjón Magnús Egilsson er á meðal þeirra sem gagnrýna þessa ákvörðun Erik Hamren í pistli sínum á vefsíðunni Miðjan.
,,Íslenska landsliðið stóð sig ekki vel í París í gær. Leikurinn fór á versta veg. Sem er svo sem eitthvað sem við mátti búast. Frakkarnir eru jú heimsmeistarar og voru á heimavelli. Búast mátti við tapi,” skrifar Sigurjón.
,,Erik Hamrén landsliðsþjálfari ber talsverða sök á hversu illa liðið tapaði. Hann valdi leikaðferð sem ekki gekk upp. Svo segja sérfræðingarnir. Fimm manna vörn sem leikinn var grátt.”
,,En eitt er mér hulin ráðgáta. Hvers vegna í ósköpunum var Albert Guðmundsson tekinn af velli? Hann var eini leikmaðurinn sem hélt boltanum. Eini leikmaðurinn sem kom við boltann í nokkur skipti hvert sinn sem hann var með hann. Meðan Albert reyndi, og tókst bara nokkuð vel, að halda boltanum reyndi ekki á vörnina rétt á meðan.”
Sigurjón fer svo aðeins yfir stöðu landsliðsþjálfarans Hamren sem gæti verið valtur í sessi eftir mjög slaka byrjun.
,,Erik Hamrén er í vondum málum. Guðni Bergsson, formaður KSÍ, ber ábyrgð. Enn virðist sem ráðning Svíans hafi verið feilspor.“
,,Úr þessu þarf að vinna. Og það strax.”