Heimir Hallgrímsson verður ekki áfram þjálfari A landsliðs karla. Þetta var staðfest á vef KSÍ nú rétt í þessu. Heimir hefur stýrt íslenska liðinu síðan 2011, fyrst sem aðstoðarþjálfari Lars Lagerbäck, síðar með Lagerbäck. Hann tók svo einn við stjórnartaumunum eftir EM í Frakklandi árið 2016.
„Sem kunnugt er urðu aðilar ásáttir um að gefa sér góðan tíma til að meta stöðuna í aðdraganda úrslitakeppni HM 2018, og taka upp þráðinn að móti loknu. Niðurstaðan er sú að Heimir hættir með liðið,“ segir í tilkynningunni.
„Við bundum miklar vonir við að Heimir yrði áfram, en niðurstaðan er þó sú að Heimir hættir með liðið að eigin ósk og vil ég fyrir hönd KSÍ þakka honum kærlega fyrir samstarfið og óska honum alls hins besta í framtíðinni. KSÍ mun nú taka næstu skref í ráðningu nýs landsliðsþjálfara,“ segir Guðni Bergsson, formaður KSÍ.
„Ég skil sáttur og þakklátur fyrir að hafa fengið að vera hluti af þessari sterku liðsheild sem þessi hópur hefur fyrst og fremst staðið fyrir. Hluti af hópi sem hefur rutt leiðina fyrir komandi kynslóðir og gert svo ótal margt í fyrsta skipti í sögunni. Það eru forréttindi að geta yfirgefið verkefnið á tímapunkti eins og í dag. Leikmenn á toppi síns ferils og hópurinn með mikla reynslu,“ segir Heimir í fréttatilkynningunni.
KSÍ hefst nú handa við að finna eftirmann Heimis en nánasr verður greint frá gangi mála á blaðamannamannafundi sem fram fer í höfuðstöðvum KSÍ eftir hádegi.
Landsliðið á 433 er í boði 
