Gianluigi Buffon, leikmaður Paris Saint-Germain, gæti spilað í markinu þar til hann verður fimmtugur.

Þetta staðfesti Buffon í dag en hann hefur margoft íhugað að leggja hanskana á hilluna á glæstum ferli.

Buffon er 40 ára gamall í dag en hann samdi við PSG í sumar eftir 17 ár hjá Juventus á Ítalíu.

,,Ég hef lært það að það væru mistök að hafa tímamörk á þessu,“ sagði Buffon við L’Equipe.

,,Þegar ég var 32 ára hélt ég að ég myndi hætta 35 ára. Eftir það breyttist mikið og ég hélt áfram.“

,,Svo sagði ég við mig að ég myndi hætta 38 ára en svo þegar ég var 38 ára þá ætlaði ég að hætta fertugur.“

,,Ég er ennþá hér í dag. Ég gæti hætt eftir sex mánuði, eitt ár eða tíu ár. Ég vil ekki spyrja að þessu og vil ekki vita það.“