Pep Guardiola, stjóri Manchester City hefur hrósað sóknarþrennu Liverpool mikið.

Liverpool tekur á móti Manchester City í fyrri leik liðanna í 8-liða úrslitum Meistaradeildarinnar þann 3. apríl næstkomandi en mikil eftirvænting ríkir fyrir leikjunum.

Þeir Sadio Mane, Roberto Firmino og Mohamed Salah hafa verið í frábæru formi á þessari leiktíð og viðurkennir Guardiola að það verði erfitt fyrir City að stoppa þá.

„Salah hefur verið frábær á þessari leiktíð en þeir eru líka með Mane og Firmino, þessir þrír eru óstöðvandi,“ sagði Guardiola.

„Liverpool spilar þannig fótbolta að það er mjög erfitt fyrir okkur að eiga við þá. Við vitum það, þeir eru svo snöggir upp völlinn og þetta verður erfitt.“

„Þetta eru 8-liða úrslit Meistaradeildarinnar og við vitum vel að það er enginn leikur léttur þegar að þú ert kominn svona langt í keppninni,“ sagði hann að lokum.