„Ég held að það sé verið að gera þeim einhvern greiða í dómskerfinu, þær fara seinna inn og hafa því lengri tíma að skemma sig,“segir Guðmundur Ingi Þóroddsson formaður Afstöðu og vísar þar í bágu stöðu kvenkyns fanga á Íslandi.
Þetta kemur fram í sjónvarpsþættinum 21 á Hringbraut þar sem rætt er við Guðmund Inga og Þráinn Farestveit,framkvæmdastjóra Verndar um háa endurkomutíðni í fangelsi hér á landi.
„Staðan hjá konunum er verri en karlanna eða sambærileg verstu tilvikunum á meðal þeirra,“ segir Þráinn í þættinum og nefnir sem dæmi að aðeins rúmlega 30 prósent kvenna sem koma á Vernd nái að uppfylla þau skilyrði sem sett eru. „Staða þeirra er verri eða sambærileg þeim verstu þegar við tölum um þá karla sem eru í slæmri stöðu í fangelsum.“
„Þær eru mun veikari þegar þær koma í afplánun. Þær koma veikari inn í fyrsta skipti,“ segir Guðmundur Ingi um konurnar sem dvelja í íslenskum fangelsum. „Þær koma í verra ástandi í afplánun, og svo þegar þær eru svo loksins komnar inn þá eru þær að koma inn oftar og oftar.“
Guðmundur Ingi bendir jafnframt á að nýja fangelsið á Hólmsheiði sé síst til þess fallið að draga úr endurkomum í fangelsi hér á landi, þó svo að aðstaðan sé að mörgu leyti betri en annars staðar.
„Persónulega held að þetta sé eitt mesta slys sem hefur orðið, þetta er illa hannað og undirmannað. Það er ekki hægt að reka þetta, það er bara ekki til peningur fyrir því Það er engin skólaaðstaða fyrir verknám, erfiðar vinnuaðstæður, þetta er ofboðslega stofnanalegt allt þarna. Þú getur ímyndað þér að þú sért í blokk að bíða eftir lyftu, allur dagurinn er þannig. Þetta er í rauninni hræðilegt fangelsi, þó að aðstaðan sé mjög fín,“ segir Guðmundur Ingi og bætir við að aðstaðan skipti minna máli en innihald fangavistar.
„Það kemur enginn betri út af Hólmsheiðinni, ég get alveg sagt það.“
