Einar Þorsteinsson, fréttamaður RÚV, varar á Facebook-síðu sinni við bíræfnum svikahröppum sem misnota gott orðspor Kastljóss. Nokkurs konar falsfréttir ganga um netheima þar sem reynt er að blekkja fólk til að græða á Bitcoin.
DV hefur áður fjallað um slíkar svikamyllur en Einar bendir réttilega á slíkar síður séu aftur komnar á kreik. „Þá er þetta fjársvikadæmi farið á fullt aftur. Núna eru ansi margir að senda mér skilaboð og forvitnast um þetta. Því miður eru fjölmargir sem hafa tapað fjárhæðum á þessu. Vinsamlegast tilkynnið þessar síður sem „svikasíður“ ef þetta birtist á FB ykkar,“ segir Einar.
Ein vinkona Einars á Facebook spyr hvernig nokkur maður gæti mögulega haldið þetta eðlilegar fréttir. Einar svarar því. „Það er einfaldlega ástæða fyrir því að falsfréttir virka. Það eru margir þarna úti sem eiga erfiðara með að sjá í gegnum lygar. Hvað þetta bitcoin-rugl varðar þá sýnist mér þetta gjarnan vera fólk sem hefur ekki fullkomið vald á íslensku og áttar sig ekki á því að textinn er illa skrifaður. Þetta er óskaplega ljótt og sorglegt að heyra í fólki sem fellur í gildruna,“ segir Einar.
