Mikið annríki var hjá lögreglunni á höfuðborgarsvæðinu frá því síðdegis í gær og þar til í morgun. Þegar mest var að gera þurfti að forgangsraða verkefnum þrátt fyrir að óvenjulega margir lögreglumenn væru að störfum en mikið annríki á vaktaskiptum lögreglunnar gerði að verkum að dagvaktin varð að vera áfram við störf.

Klukkan 18.37 valt rúta með um 30 manns á Vesturlandsvegi við Kjalarnes. Tuttugu mínútum síðar fauk bifreið með 10 farþegum út af Vesturlandsvegi skammt sunnan við Hvalfjarðarveg. Meiðsli á fólki voru lítil sem engin í báðum óhöppunum. Björgunarsveitir og lögregla voru send á slysstaði.

Klukkan 18.39 lentu tvær bifreiðar í árekstri á Korpúlfsstaðavegi. Báðar bifreiðarnar skemmdust mikið en ökumenn sluppu án teljandi meiðsla. Talið er að önnur bifreiðin hafi verið illa búin til vetraraksturs en mjög slæmt veður var á þessum slóðum þegar áreksturinn varð.

Meðal annarra verkefna lögreglunnar má nefna að um klukkan 19 var bifreið ekið á ljósastaur á Bústaðavegi. Engin meiddist en bifreiðin var óökufær á eftir.

Sex ökumenn voru handteknir í gærkvöldi og nótt grunaðir um akstur undir áhrifum fíkniefna.

Um klukkan fimm í nótt voru þrír erlendir karlmenn handteknir en þeir eru grunaðir um sölu fíkniefna og ólöglega dvöl í landinu.

Tveir karlmenn voru handteknir í nótt grunaðir um þjófnað úr verslunum.

Þetta er aðeins brot af þeim verkefnum sem lögreglan sinnti frá því klukkan 17 í gær.