Lögmaður hafnfirskra systra telur að mál þeirra hafa ekki fengið eðlilega rannsókn hjá lögreglunni og hefur lagt fram kærur fyrir hönd systranna og móður þeirra til ríkissaksóknara og héraðssaksóknara. Í kærunum eru ótilgreindir starfsmenn lögreglunnar á höfuðborgarsvæðinu kærðir vegna þeirra meðferðar sem málið fékk hjá lögreglunni eftir að barnaverndarnefnd Hafnarfjarða tilkynnti lögreglunni um hugsanleg kynferðisbrot föður stúlknanna gegn þeim. Mál þetta komst í hámæli í vor þegar upp komst um afskipti Braga Guðbrandssonar, fyrrverandi forstjóra Barnaverndarstofu, af málinu.

Fréttablaðið skýrir frá þessu í dag. Haft er eftir Jóhanni Baldurssyni, lögmanni mæðgnanna, að hann telji að lögreglunni hafi verið óheimilt að rannsaka ekki málin.

Barnaverndarnefnd Hafnarfjarðar sendi lögreglunni tvær tilkynningar um hugsanleg kynferðisbrot gegn stúlkunum. Þá fyrri í árslok 2014 og hina síðari í árslok 2016.

Jóhann sendi ríkissaksóknara kæru fyrir rúmum tveimur mánuðum vegna síðari tilkynningar barnaverndarnefndar. Hann sendi síðan aðra kæru fyrir um tveimur vikum til héraðssaksóknara vegna fyrri tilkynningar barnaverndarnefndar. Fréttablaðið hefur eftir Jóhanni að hann geti fullyrt að lögreglan hafi ekki rannsakað mögulega refsiverða háttsemi sem hún hafði upplýsingar um.