Brotist var inn í íbúð í Berjarima í Grafarvoginum í gær, ekkert var tekið en mikið skemmt. Eigandi íbúðarinnar segir í færslu í opnum Fésbókarhópi að líklegast hafi verið um börn að ræða. Það sé haft eftir vitnum og þar að auki séu fótsporin á vettvangi lítil. Telur eigandi íbúðarinnar að brotist hafi verið inn milli kl. 13 og 18 í gær, engum munum hafi verið stolið fyrir utan lykla en mikið skemmt. Var matvörum hellt niður og krotað var á hurð.

Samkvæmt skeyti frá lögreglu fóru innbrotsþjófarnir inn í gegnum svalahurð sem hafi verið opin og svo rótað í öllu.

Eigandinn auglýsti eftir lyklunum og bað foreldra í Grafarvogi að hafa augun opin eftir lyklum með viðarkúlu. Ekki náðist í eiganda íbúðarinnar við vinnslu fréttarinnar.